இந்தியாவின் லட்சிய விண்வெளி திட்டமான சந்திரயான்-2 இந்திய விண்வெளி ஆராய்ச்சி நிறுவனத்தால் (இஸ்ரோ) தோல்வியுற்றதாகக் கருதப்பட்ட சில மாதங்களுக்குப் பிறகு, இஸ்ரோ தலைவர் கே.சிவன் சந்திரயான் -3 திட்டம் தற்போது தொடங்கி நடந்து கொண்டிருப்பதை உறுதி செய்துள்ளார். மேலும் இது 2021 ல் முடிக்கப்பட்டு விண்ணில் செலுத்தப்படும் என தெரிவித்துள்ளார்.
சந்திராயன்-2 ல் கற்ற பாடம்:
இஸ்ரோ தலைவர் கே.சிவன் கூறுகையில், நாங்கள் சந்திரயான் -2 இல் நல்ல முன்னேற்றம் அடைந்துள்ளோம். எங்களால் வெற்றிகரமாக தரையிறங்க முடியவில்லை என்றாலும், ஆர்பிட்டர் இன்னும் செயல்பட்டு வருகிறது. இது விஞ்ஞான தரவுகளை தயாரிக்க அடுத்த 7 ஆண்டுகளுக்கு செயல்படப் போகிறது என்றார். மேலும், விக்ரம் லேண்டருடனான தகவல்தொடர்பு இழந்துவிட்டபோதிலும், திட்டத்தின் நோக்கங்கள் 90-95 சதவிகிதம் நிறைவேற்றப்பட்டது. இரண்டு மாதங்களுக்குப் பிறகு, விக்ரம் லேண்டர் சந்திரனில் ஒரு கடினமான தரையிறக்கம் செய்ததாக விண்வெளி அமைப்பு ஒப்புக்கொண்டது.
தமிழ்நாட்டில் இரண்டாவது விண்வெளி மையம்:
இரண்டாவது விண்வெளி மையம் அமைப்பதற்கான நிலம் கையகப்படுத்தல் ஏற்கனவே தொடங்கப்பட்டுள்ளது. இந்த இரண்டாவது ராக்கெட் ஏவுதளம் தமிழ்நாட்டின் தூத்துக்குடியில் அமையும் என்றவாறு தெரிவிக்கப்பட்டுள்ளது.
சந்திராயன்-3 குறித்து அவர் தெரிவித்தது,
2020 ஆம் ஆண்டில் இந்தியா சந்திரயான் -3 ஐ அறிமுகப்படுத்தப்போவதாக மத்திய அமைச்சர் ஜிதேந்திர சிங் நேற்று தெரிவித்தார். இந்நிலையில் இஸ்ரோ ஒரே நேரத்தில் சந்திரயான், ககன்யான் திட்டங்களில் வேலை செய்யும். மனிதனை விண்வெளிக்கு அனுப்பும் ககன்யான் திட்டத்துக்கு 4 வீரர்கள் தேர்வு செய்யப்பட்டுள்ளனர். நான்கு விண்வெளி வீரர்களுகான பயிற்சி ரஷ்யாவில் ஜனவரி மூன்றாவது வாரத்தில் தொடங்கும் என்று இஸ்ரோ தலைவர் கே.சிவன் கூறினார்.
