ஜூனியர் பெண்களுக்கான ஆசிய கோப்பை ஹாக்கி தொடர் ஜப்பானில் நடைபெற்று வருகிறது. 10 அணிகள் பங்கு பெற்றுள்ள இந்த தொடரில், தலா 5 அணிகள் இரு குரூப்களாக பிரிக்கப்பட்டு லீக் சுற்றுகள் போல் போட்டியிட்டு வருகின்றனர். இதில், இந்திய அணியானது குரூப் A யில் தென் கொரியா, மலேசியா, சீன தைபே மற்றும் உஸ்பெகிஸ்தான் ஆகிய அணிகளுடன் இடம்பெற்றுள்ளது.
வாட்ஸ் அப்: Enewz Tamil வாட்ஸ் அப்
தனது முதல் லீக் சுற்றில் உஸ்பெகிஸ்தானுக்கு எதிராக விளையாடிய இந்திய மகளிர் அணி 22 கோல்கள் வித்தியாசத்தில் அபாரமாக வெற்றி பெற்றது. இதனை தொடர்ந்து, நேற்று 2 வது லீக் போட்டியில் மலேசிய அணியை எதிர்த்து போட்டியிட்டது. இதில், மலேசியாவின் டியான் நசெரி 6 வது நிமிடத்திலேயே கோல் அடிக்க, 10 வது நிமிடத்தில் இந்தியாவின் மும்தாஜ் கான் கோல் ஒன்றை அடித்து பதிலடி கொடுத்தார்.
இதன் தொடர்ச்சியாக இந்தியாவின் தீபிகா 26 வது நிமிடத்தில் கோல் அடித்ததன் மூலம், ஆட்டத்தின் முதல் பாதியில் 2-1 என இந்திய அணி முன்னிலை பெற்று இருந்தது. இதையடுத்து தொடங்கப்பட்ட 2வது பாதியில் இரு அணிகளும் ஒரு கோல் கூட அடிக்காத நிலையில், இந்திய அணி 2-1 என்ற கோல் வித்தியாசத்தில் வெற்றி பெற்றது. இந்த வெற்றி மூலம் புள்ளிப் பட்டியலில் முதலிடம் பிடித்து அரையிறுதிக்கு முன்னேறுவதில் முன்னிலை பெற்றுள்ளது.
