ஐபிஎல் தொடரின் இன்றைய போட்டியில் சன் ரைசர்ஸ் ஹைதராபாத் அணி கொல்கத்தா நைட் ரைடர்ஸை எதிர்கொள்கிறது. இரு அணிகளும் முதல் போட்டியில் தோல்வியை தழுவியதால் இந்த சீசனில் முதல் வெற்றியை பதிவு செய்ய கடுமையாக முயற்சிக்கும் என்பதால் ரசிகர்கள் மத்தியில் எதிர்பார்ப்பு அதிகரித்துள்ளது. ஐதராபாத் அணி தொடக்க ஆட்டத்தில் பெங்களூரிடமும், கொல்கத்தா அணி மும்பையிடமும் தோல்வி அடைந்துள்ளது.
கேப்டன் தினேஷ் கார்த்திக் தலைமையிலான கொல்கத்தா அணி கடந்த போட்டியில் பேட்டிங், பவுலிங் என இரண்டிலும் சொதப்பியது. மிகவும் எதிர்பார்க்கப்பட்ட அதிரடி ஆல்ரவுண்டர் ரஸ்ஸல், பாட் கம்மின்ஸ் போன்றவர்கள் இம்முறை பார்முக்கு வரவில்லை என்றால் கொல்கத்தா வெற்றி பெறுவது கடினம். பவுலிங்கை பொறுத்தவரை சுனில் நரைன், சிவம் மாவி மீது எதிர்பார்ப்புகள் அதிகமாக உள்ளது.
கேப்டன் டேவிட் வார்னரின் சன் ரைசர்ஸ் ஹைதெராபாத் அணி பேட்டிங்கில் பைஸ்ட்ரோ, மனிஷ் பாண்டே நல்ல பார்மில் உள்ளது மிகப்பெரிய பலமாக உள்ளது. இருப்பினும் பவுலிங் பிரிவில் ஹைதெராபாத் அதிக கவனம் செலுத்த வேண்டி உள்ளது. வார்னர் பழைய அதிரடி பாதைக்கு திரும்பினால் இன்றைய போட்டியில் பல வான வேடிக்கைகளை ரசிகர்கள் கண்டுகளிக்கலாம் என்பதில் சந்தேகமில்லை.
இவ்விரு அணிகளும் இதுவரை 17 முறை மோதியுள்ளன. அதில் கொல்கத்தா 10 முறையும், ஹைதெராபாத் 7 முறையும் வெற்றி பெற்றுள்ளது.
உத்தேச 11 அணி:
- சன் ரைசர்ஸ் ஹைதராபாத் : டேவிட் வார்னர் (கேப்டன்), ஜானி பேர்ஸ்டோவ் (கீப்பர்), மனிஷ் பாண்டே, பிரியம் கார்க், விஜய் சங்கர், அபிஷேக் சர்மா, முகமது நபி, ரஷீத் கான், புவனேஷ்வர் குமார், சந்தீப் சர்மா, கலீல் அகமது
- கொல்கத்தா நைட் ரைடர்ஸ் : சுனில் நரைன், சுப்மான் கில், நிதீஷ் ராணா, ஈயோன் மோர்கன், ஆண்ட்ரே ரஸ்ஸல், தினேஷ் கார்த்திக் (கேப்டன் & கீப்பர்), நிகில் நாயக், பாட் கம்மின்ஸ், குல்தீப் யாதவ், சந்தீப் வாரியர், சிவம் மாவி
